無車，無樓，無十萬百萬，仲係公司入面既小薯仔，月入無幾皮，如果你要從呢幾方面入手去睇，對唔住，我小小成就都無。唔，應該話個小小既成就係仲夠食夠使有家用俾唔使攤大手板問父母拎銀仔。
係呢個凡事用外在物質黎衡量一個人成敗既社會，同人講你有幾成功首先你要話俾人知，你係公司已經成功升到咩位，有幾多個人係你下面。身家雖然無幾千萬，但勝在有層樓係手，首期邊個俾唔重要。喂，無樓唔緊要，起碼有格車玩下手，遲下可能仲買到層樓。然後有個穩定既另一半，疊埋心水過多幾年做對好夫妻，直落生仔生女湊個”好”字。
對比身邊同年朋友，特別大學畢業個班，可以話大家既生活甚至所謂既「社會地位」已經有明顯不同。有人係公司一升再升，未算得上一人之上萬人之下，但都稱得上公司既重點人物；有人工已轉，正所請魚唔過塘唔肥，身價即漲N倍；有人一畢業就入左政府打工，當時人工對比下已經離哂地；有數人已經有屠樓起手，仲有埋車．．．
睇落又真係幾成功咁喎，有車有樓有地位有將來，但其實成就係咪真係咁黎睇？(拿，同時我亦真心佩服同為朋友既成功而感到開心。)
無可否認，用資產和地位來衡量一個人成功與否是最簡單直接的方法，但這只適用於衡量的目的用來比較事業與物質上的成敗。但若果呢方面你無咩顯赫既戰績，係咪就等同你既人生已失敗？其實呢方面不過係其中一把尺。
有人廿幾歲，身家無幾百萬，但已經走過世界幾廿個家國，得到既唔止係護照上面既印，而係人生體驗同眼界既擴闊；有人廿幾歲，無車無樓，但出版過幾本小作，雖然書同紙都唔多值錢，值既係曾經係香港著作呢方面留過名，亦為自己人生寫下不一樣既一頁；有人廿幾歲，人工無幾皮，但卻奉獻左無數既金錢同時間係公益善款方面，有既係無私博愛既心，得到既係心靈上的富有，幫助到既係不能用金錢去衡量既人、事、物；有人廿幾歲，職位依然係薯仔，無走遍世界無出版書作無做善事，不過仍為生命努力過每一天，不求轟轟烈烈地闖出一片天，只求無悔無憾地完成每一件事。
驟眼看，佢地好有成就咩？呢D野全部可能睇唔到摸唔到，即使睇到摸到又值幾多錢，可以攬住佢地過世咩？喂，但點解成就一定要同金錢掛鉤？
世界上有唔同類型既人，想法亦不盡相同。你要既野唔代表人地都渴求，無需要用自己把尺去量度別人。單位尺度唔岩，點度都無用。香港地呢個以金錢經濟掛帥既地方，當普羅大眾都被迫用住同一把尺去量度別人既成敗得失，我只能說呢個係一個好悲哀既社會價值。同時，我地而係咪需要繼續人云亦云，將自己認為岩同值得既價值觀永遠封塵呢？
Facebook專頁：https://www.facebook.com/backpackersopoor
沒有留言:
張貼留言