老老實竇，時下有不少女中豪傑已經可以好瀟灑咁就咁揹個背囊出發獨自去尋找他鄉的故事。你會問：「自己一個唔驚咩？」，好多時得到既答案都係 – 有咩好驚。
其實又真係無咩咁大陣仗，只要自己識醒水，正常都唔會發生好危險既事情。濕濕碎既盪失路、俾人呃下錢、搭錯車、落錯車等等都不過係旅程中必然會發生既平常事。計我話，女仔最怕既並唔係心理上既關口，而係生理上既不便。
好簡單既例子：
- 去旅行撞正個幾日，所有沙灘水上活動只可遠觀而不可褻玩焉。住係溫泉旅館想來個溫泉浴？唔好意思，食溫泉蛋就有你份。
- 你或者唔知道垃圾桶對女士有幾重要，特別係廁所同浴室入面。有時設備唔齊全既Hostel，真係唔明點解馬桶附近無垃圾桶，塊棉棉要好好將佢包住行出去掉。同樣地沖涼都會出現同樣既情況．．．呼，作為女人既自己都覺得有點兒不雅。
- 大熱天時，行到身水身汗，最希望既除左係飲返杯透心涼既凍飲，就係好想將已經濕哂既上衣掉左佢，務求同微風有最親密的接觸。唔，你當你自己係男人呀？
- 女人點都會比男人帶多樣衣履，查實都唔會霸多好多位。問題在於有時沖涼真係會唔記得扲埋入去，係屋企就話可以叫呀媽家姐幫你扲，出到去沖完涼先發現，咁就你諗你啦，實解決到既。
- 去廁所男女方式有別細細個已經知，佢最大既不便之處並唔係要等，而係去到比較落後既地方或者要坐超長途車既時候，真係連一個基本既廁所都無(信不信由你)。呢個時候，終於明白點解男人去廁所可以快咁多同可以當任何一塊土地都係專屬既洗手間．．．
以上例子只係小妹既個人經驗所得，並不代表所有女性既立場。不過點都好，有時真係好希望自己既男人而唔係女人，特別去旅行既時候。
沒有留言:
張貼留言