窮看世界。噢耶！ : 背包客經常被人問的問題

每次旅行回來，朋友總會問我一大堆類似的問題。久而久之下，好像已經有個標準答案一樣．．．

總括來說，他們的問題都離不開：

1. 你咁有錢成日周圍去？
邊個話去旅行就要花好多錢？住hostel、食下麵包、唔瘋狂購物、行多兩步．．．就住洗真係唔需要好多錢。話時話，我去左兩個幾月旅行，計埋機票，衣食住行加埋保險都只係用左兩萬蚊左右。仲有！唔係因為我有錢可以成日去玩，而我堅係有草錢，平時點慳無同你講啫！

2. 你自己一個去真係唔驚？
有咩好驚？只要自己識得執生同保持冷靜，無問題係解決唔到。咁你仲驚咩？

3. 唔悶咩？？？？？？
你肯同人講野吹水，包你日日有新旅伴同你一齊玩，到時你反而想有多D私人時間。係呀係呀，仲唔會口臭。

4. 無買旅遊書，又無計劃過，你點識搵景點/搭車？
呢個易啦，住hostel問下職員或者其他背包客，實答到你！佢地仲有可能係世界上最好既travel guide。哈哈哈！

5. 無GPS，無data，無WIFI，無Google map，你識路咩？
唔識架，但你識問人架嘛！正所謂路在口邊，有地址，有地方名你驚你去唔到咩？如果你搵hostel既話，有D網仲會Send埋個direction俾你，照住行就得啦！再唔得，問人啦！

6. 真係安全架？
睇你識唔識保護自己架咋喎。貴重財物唔好露眼，著到一睇就知你仲窮過佢地，唔好夜晚晚自己行小路，其實好多野你都避到。

7. 真係識到朋友架？
點解唔得？除非你唔敢開口同人say hi，又或者你自成一角。出黎行，最緊要靠朋友，分分鐘你今日識到佢，他日佢就幫到你！

8. 屋企人唔擔心咩？
擔心架，養兒一百歲，長憂九十九，即使你係香港佢地都會擔心你著唔暖食唔飽，何況你去左地球既另一邊。重要既係你每日同佢地報平安就得啦！(同埋唔好係旅程未完時同佢地講自己遇到咩問題！哈哈哈！)

9. 蘯失路咁點算呀？
繼續蘯到天昏地暗．．．其實有時都幾享受蘯失路，你會睇到更多完全無預計過會見到既景色。當然，點都要蘯返去既，呢個時候都係靠把口，問下路人，點都返到去既。

10. 去咁耐有無瘦到？
好．可．惜！無！

喂，睇左咁多，你仲諗咩？有得選舉同環境許可下，去旅行啦！
其實自己一個又有咩好怕喎！

(攝於斯洛維尼亞 - 盧比安納)

窮看世界。噢耶！