兩萬蚊兩個月，十三點五個國家，無難度

每次去完旅行返黎，朋友都會問我到底用左幾多錢，而我都喜歡叫佢地估下，睇下大部份人覺得幾多錢先夠玩。好多時，佢地都會回應返一個字：「下？」

而今次兩個多月既巴爾幹半島，無錯，小妹唔係窮遊下全程只係用左大約兩萬左右。歸根究底其實係巴爾幹國家物價都比較低，本著應洗得洗，應慳得慳既原則下，唔洗兩萬都絕對無問題！

機票：
去程 - Aeroflot Airlines，香港飛布達佩斯中途莫斯科轉機單程機票連稅約HK$2,500
回程 - Etihad Airways，塞爾維亞首都貝爾格萊德飛香港中途阿布達比轉機單程機票連稅約HK$3,500
當初買單程因為未知自己幾時回港，但如果你知自己回程時間的話，來回機票絕對平好多。曾經見過貝爾格萊德飛香港都係HK$4,500左右，咁又慳多D。而點解係十三點五個國家？皆因我選擇係阿布達比停十四個鐘轉機，有時間可以出去行下，但又玩唔哂，咁．．．當佢半個啦。

保險：
買左兩個月多一個星期，保費都係大概HK$600。邊間保險公司？自己上網研究下啦！哈哈哈。

住宿：
成日都好有衝動沙發衝浪下(Couchsurfing)，但基於成日都係今日先諗聽日去邊，呢個情況聽講好難就到沙發主人。加上自己本身鍾意識新朋友，所以全程都係住Hostel。不過巴爾幹國家Hostel既價錢同西歐絕對係差天共地，西歐國家閒閒地都要HK$100或以上，但巴爾幹最平都係HK$40幾。想住好小小都係貴HK$20-30不等。拉平來計當每晚HK$80，兩個月六十日都只需HK$4,800，平過你係香港住一個月既劏房。(成件事好悲哀．．．)

交通：
巴爾幹半島同歐洲唔同，後者好多時國與國既交通都會選擇火車，有時都會坐下Eurobus。境內交通都係以鐵路為主，所以好多人都會買將Europass平小小。但前者無論國與國既交通以至境內都係以巴士為主，最重要係車費都好平！三四個鐘車程只需HK$50左右，有時要九至十個車程都唔過HK$200！再睇返港鐵，來回過一過海都食左你起碼HK$30！

膳食：
再重申巴爾幹國家物價真係好平，當然食都唔例外。平平地又見得人既餐廳，食到你攬住個肚走都係HK$30-40，平民餐廳仲有機會平一半！加上小妹平時唔係食得好多，可能食個包已經飽左，呢方面就真係洗唔多好多。唔，我諗洗得比較多既應該係雪糕同牛奶，一球雪糕大大杯最平食過HK$3，最貴都係HK$10左右，加上炎炎夏日，基本上日日都食一次。而1L牛奶都只需大概HK$7-8，又係當水咁飲．．．唔好處係咩？咪肥左返來囉．．．

(只需HK$35左右)

手信：
每個地方我都會揀一D特別既手信俾朋友，好彩佢地無指明叫我買咩買乜，所以見岩心水就會買。當然唔會買太大型既野啦，畢竟揹住既係Backpack，而且唔係揹住一兩日，所以我都只係會買細細件同埋食得既既野。總共買左幾多錢？我點會係度公開呀，哈哈哈哈！

基本上整個旅程兩個月我無真係慳到去極點，雖然都係本著窮遊既心態，但都係果句應洗得洗，應慳得慳。有時見到想食既野，可以係貴小小，不過今次唔食下次都唔知等到幾時，無理由唔試下當地特色小食架；要去呢個地方對比下車費都唔算平喎，之但係無理由下次特登坐飛機返黎只係去呢度架，上車啦；由呢度去個度其實行到過去，咁不如行下啦，順便睇下沿路風景，又慳埋車錢；其實我都係住一晚啫，環境係就係差D，但無所謂啦平平地．．．

去旅行，只要心中有一個適合當地物價既預算俾自己，跟住黎玩，其實真係唔需要窮遊到咩都唔食唔試唔去。兩萬蚊兩個月，十三點五個國家，無難度！最有難度既咪就係你有冇咁長既假期囉．．．

(攝於Albania的一個巴士站)

Facebook專頁：https://www.facebook.com/backpackersopoor