港式。角色

人身如戲，戲如人生。

虛擬世界的角色扮演遊戲你或者耳熟能詳。

但現實世界裡，對於自己的人生，你到底對正扮演的角色又有多少了解？

現在的我，很簡單，卻多采多姿。

姓名：窮家女孩

性別：女

出生地：香港

角色如下：

港式．中堅角色

1. 同胞　－　家庭成員之一這是最基本了吧。

2. 叛亂者　－　放心，唔係異形侵略地球個種，而係家父家母總會不時話下我：你呢個衰女包，正一有破壞無建設。

3. 奴隸獸　－　身邊總係東一隻、西一隻。講緊咩？咪係打工仔們囉！

4. 不死戰士　－　故事中有悲角(奴隸獸)，就自然有正面角色。不死戰士泛指無論你今日死貓食左幾多隻，鑊補左幾多個，你都係不死既傳奇人物。聽日準時「老地方」見！

5. 隱形使者　－　其實香港心地好既人真係好多。做完一件好事、善事唔需要公告天下，只需要係自己心中慢慢回味便心足矣。

港式．業餘角色

1. Sportswoman　－　不能自稱運動員，只不過係由中學時代開始便瘋狂愛上各式各樣既運動：跑步、行山、跳繩、打波到近幾年先學識既游水，雖則唔係樣樣皆精，但我堅持得閒就要出一身汗！

2. 讀者　－　都係學生時代開始建立既興趣。上至天文，下至地理，左至旅遊記事、右至偵探懸疑，能夠通電的都愛。

3. 攝記　－　錯！我唔係業餘記者，只係業餘攝影老友記。太愛將美麗的景物就咁「卡嚓」一聲，噢耶～成為我的永恆回憶。

4. 廚記　－　哈哈！根據上文下理應該估到我並唔係廚師，只係近排愛上下廚樂。失敗、成功，再反覆嘗試，從cooking中模擬人生。

5. 學生　－　「你唔係畢左業架啦咩？」正所謂，自學人生，自助「學習」。為左充實自己，我走去學左幾個超短期既西班牙文、泰拳、瑜伽同心理學。不過希望可以繼續向西班牙文進發！

6. 未考試的司機　－　很明顯了吧。一切皆因睇到一個相機廣告開始：一個女仔扲住相機，揸住架車自駕遊，仲坐係車頂睇日落。一個字：爽。

7. 偽文青　－　窮看世界。噢耶！ 多謝細閱我的文章。總算是今年的新嘗試吧！

8. 小偷　－　我係好好市民！我只愛偷：時間。成日都覺得時間唔夠用，盡可能偷得一分一秒！偷得浮生半日「衝」嘛！

9. Traveler　－　遊遍世界，用眼睛、雙腳感受未知的國度。

10. 探索者　－　我要繼續尋找更多的角式，無論是業餘也好，中堅也好。只要可令生命更發光發亮就可以。

噢耶～睇黎我都好業餘下，皆因中學時深受一位啟蒙老師的一句話影響：No Regret

自此發誓，我不想，亦不要因自己沒為生命親自塗上色彩而後悔。

歲月的流逝，反要將逐漸失去光輝的青春倒帶，變得更有聲有色。

你呢？你預備好演活自己的生命角色了沒有？

Facebook專頁：https://www.facebook.com/backpackersopoor

U Blog： 窮看世界。噢耶！